كتب الدكتور وجيه ذكار
يعني أقسام الإستعجالي تعبَّات بالمرضى اللي قصّ عليهم الضو وهوما يستعملوا في ماكينات الأكسيجين في ديارهم.
وتوة يزيد عليهم المرضى اللي قاعدين يتوفّاوا ولا يرقدوا في الإنعاش بسبب ضربة شمس، واللي في أكثر من حالة كانوا في منازلهم ومش في الشارع، لكن بحكم انقطاع الضو وانعدام التكييف مع حرارة الطقس هاذي، حالتهم تعكّرت بسرعة وهوما في ديارهم،
من غير مانحكيوا على حالات المواطنين اللي مشاتلهم الـSAMU لدارهم ولقاوهم متوفّين.
في المقابل، ما فما حتى بروتوكول طوارئ مُعلن!
ما فما حتى توضيح للرأي العام، ولا حملة توعية أو تحسيس!
وما فما حتى خطّة واضحة ومعلنة للتدخل في الأزمة هاذي!
تي حتى من إحصاء لحالات الوفاء واعلام الرأي العام بيها مافماش!
ما فما كان شوية أصحاب قاعات أفراح و مديري سبيطارات، بمبادرات فردية منهم، طلبوا من المواطنين يجيّبوا يركّبوا ماكينات الأكسيجين متاعهم في السبيطار اللي الضو فيه ما يقصّش.
وبعض الأطباء والممرضين اللي يعانيوا في ظروف عمل رديئة، ووصلنا نطلبوا من المرضى بش يمشيوا يشريوا الثلج "glaçon" من الحماص اللي مقابل الاستعجالي...الخ
وصفحة وزارتنا، في المقابل، لاهية في عالم آخر تهبط في منشورات على المعرف الوحيد وتعمل في اجتماعات تشجيع على التلقيح.
في الأخير، الوزير الحالي بعيد كل البعد عن ادارة وزارة سيادية كيما وزارة الصحة، وخاصة وقت تشوف الضعف الكبير في التعامل مع أزمة قاعدة تؤدي بحياة العباد،
واستقالته أصبح أمر ضروري ومستعجل !